Hrvatsko kulturno društvo u Gradišću

Kroatischer Kulturverein im Burgenland, gegr. 1929

 
 
 

Čitanje je oživilo bivšu pekariju

Doroteja Lipković sa svojimi družicami Na početku svojega čitanja u lipo i ukusno uredjenoj seoskoj kavani Klimpuha 13. oktobra, je Doroteja Zeichmann razložila, zač je izibrala uprav bivšu pekariju Jakova Lipkovića za ovo čitanje.

Kot divičica je ona nemer skupa sa svojimi družicami išla svaku nedilju po vičernji nje stricu Jokacu (pekar je nemer bio bratić nje oca), ki je posebno za nje otvorio “lodnu”, da bi si mogle kupiti svakorjačke slatkarije: čokolad, štoljverke, cukriće, sladoled i mnogo drugoga. Pokidob si je autorica kot temu svojega čitanja izibrala “ditinstvo u Klimpuhu, ljubav i drugo...” , počela je spominanjem na lozu i pri tom čitala tekst Im Wald, koga je naklada lexlist 12 pred kratkim objavila u čitanki za sridnje škole Lesen ab 10. Gedankenplätze.

Zatim si je autorica dilila s publikom sve ono Ča sliši k ditinstvu u Klimpuhu. Iz zbirke Med nebom i paklom je recitirala pak nekoliko pjesam o ljubavi kot i haiku pjesmice.

Iz svoje prve zbirke Pjesme/Gedichte izibrala je Doroteja dvi stare pjesme: Muži i Ništ ne hasni. A na kraju je pak recitirala dvi od svojih novijih pjesam, ke ćedu morebit (ako se ugoda) objaviti kljetu u nekoj novoj zbirki. Kavana je bila puna, ča je autoricu i vlasnike Evu i Günthera Kaina sigurno veselilo. Po čitanju se je još dalje razgovaralo i uživalo uz dobro piće i domaću orihovu masnicu.